اذا صار عندك مشكلة بالانترنت في لبنان كيف تحلها ؟
اذا صار عندك مشكلة بالانترنت في لبنان كيف تحلها ؟
مين ما عندو انترنت ؟ اكيد الكل والاغلبية عندهم DSL يعني الإنترنت عبر خط التلفون مهما كانت الشركة من اوجيرو لحتى شركات الخاصة متل Sodetel او Teranet وفي كتير !
بس سؤال إذا الانترنت انقطع عندي وما كنت اعرف شو المشكلة شو الحل ؟
من يومين تقريباً انقطع عندي الانترنت وحبيت شارك شو عملت وهل يا ترى انحلت ؟ رح نشوف !
أول ما ينقطع الانترنت كثير من الأشخاص ما رح تفكر كتير غير انه يعمل Restart للراوتر ، ومش غلط اكيد ! بس انا من الاشخاص يلي بحب يعرف شو السبب وهيدى حقي .
واول شي رح اعملو رح ادخل على الراوتر وشوف شو المشكلة !
الراوتر عندي هون متصلة بالخط ( خط الهاتف ) والارسال تمام ، طيب يعني المشكلة من وين ؟
هون رح طفي راوتر وارجع دورها ، معقول تكون مروكبة ؟ معقول ليش لأ !
نفس المشكلة ؟
بسيطة هون كمان لازم افحص الخط ، خط الهاتف وشيل الفلتر ورح اوصلها مباشرة للراوتر بلا اي فلتر … وكمان نفس المشكلة !!!
طيب خير خير ، عندي راوتر تانية عملت Config وجربت ، كمان نفس المشكلة ….
يعني هون للأسف شو لازم نعمل ؟
نعم رح احكيها … بكل اسف …. لازم دق للشركة ويلي انا مشترك فيها هيي Sodetel ودقيت على 1278 للخدمة التقنية .
انا : مرحبا … يعطيك العافية … لك حبيب عندي مشكلة بالانترنت ..
الموظف : اتفضل استاذ شو المشكلة ؟
انا : من صبح ما عندي انترنت وعملت Check على كل شي والمشكلة من عندكم .
الموظف : طيب استاذ حسب ما ظاهر عندي ، عنا ما في اي مشكلة وكل شي تمام فيك تخبرني اذا ضو DSL مضوا ؟
انا : حبيب معك IT Admin وانا والله بفهم ، بس رح امشي معك شو بدك اعمل ؟؟؟
الموظف : استاذ بدنا منك تخط كايبل من راوتر للكمبيوتر ! وتفوت على الراوتر
انا : طيب اوكي ، فايت على الراوتر من تلفون شو بدك اعمل ؟؟؟
الموظف : بدي منك تعملها Reset وتكمل الخطوات معي !
انا : اوكي،،، عملتها وحطيت L اكاونت مع الباسورد و VPI 0 و VCI 35 بعدين ؟؟؟
الموظف : اه تمام ، بتعرف فيهم ، طيب استاذ اذا ما مشي الحال رح نفتح Ticket ومنرجع منحكيك!!!
حلو كتير هون انا عرفت انو شو ؟؟؟ راحت الشغلة لـ اياااام ، بس صبرت عليهم , خلص اول يوم والحمدالله ما حدن عبرني وبعدو عندي بالبيت ما في انترنت ! شو لازم نعمل ؟؟؟
اكيد ندق للشركة وننشر حريمهم ..
الموظف خبرني وقال : استاذ المشكلة مش من عنا من اوجيرو ونحن عم نتواصل معهم !! وما فينا نعطيك وقت .
يعني الله اعلم يمكن تروح شهر الله بس بيعلم …
انا هون شو صار لازم اعمل ؟؟
رح دق على اوجيرو
الله وكيلكم يا ريت ما دقيت
رد عليي واحد عمرو شي ٧٠ سنة يمكن , وخبرتو انو شركة Sodetel خبرتني انو في مشكلة بالانترنت من عندكم ،
الختيار : يا عمو الخط عندك متل ليرة ما فيي اي مشكلة ، المشكلة من شركة الانترنت ….
انا هون خلص معقول يطلع المشكلة فيني ؟ معقول انا ما بفهم 
؟؟؟ يا خيي بهالبلد كل شي معقول …
واكيد رجعت دقيت لشركة Sodetel وحكيت خلص يا قاتل يا مقتول ،،، اول ما اتصلت رد عليي الموظف وعرفني وخبرتو شو حكا موظف اوجيرو ..
الموظف : استاذ مع احترامي لشركة اوجيرو بس الشخص يلي حكا معك ما كتير بيفهم بهيك قصص ( للصراحة معو حق ) ونحن عم نتابع مشكلتك بس اذا عندك شخص واصل ب اوجيرو احكي معو بس كرمال يسرع الموضوع مش اكتر !!!!!
انصدم ؟؟؟
لا عادي ابداً شو عايش بالسويد انا ، بلدنا هيك حتى بمشكلة الانترنت بدها واسطة
ولحسن الحظ بعرف شخص عندو معارف قوية ب اوجيرو وعطيتو رقم الهاتف وناطر الحل ..
وكمان كرمال شغل كل عالم بخطي ارسلت رسالة الى موقع اوجيرو واكيد technical support بالموقع مش رح يكون ختيار
حالياً : اليوم الثالث ( بلا انترنت )
اليوم الرابع ( انتظر )
اليوم الخامس (انتظر )
أسبوع ( انتظر )
شهر ( تم حل المشكلة )
تم حل المشكلة والاشتراك مع اوجيرو والمشكلة كانت من شركة Sodetel
